xaflad aad
u balaaran oo aan horay uga dhicin nooceeda magaalada Muqdisho
laguna soo gaba gabaynayay Ixtifaalka Mowliidka Nabi Maxamed
CSW, ayaa lagu qabtay hotel Saxafi ee magaalada Muqdisho.
Xafladaani oo ay kasoo qeyb
galeen culamaa'udiinka Soomaaliyeed,odayaasha dhaqanka oo
uu hogaaminayay Sheekh Muuse Cagaweyne qeybaha kala duwan
ee bulshada, ayaa waxaa ay ahayd mid looga gol lahaa gunaanadka
iyo gaba gabada xafladihii isdaba jooga ahaa ee lagu weynaynayay
dhalashada nabigeena Muxamed CSW, kuwaasi oo soo bilaawday
horaanta bisha Mowliid ee aynu kasoo gudubnay.
Dhinaca kale Sheekh Aweys Cabdi Cali ayaa goobta ka aqriyay
bayaan ay soo saareen culamaa'udiinka kaasi oo u qornaa
sida tan:
kadib markii ay culimada Ahlu-sunna Waljamaaca daraasad
dheer ku sameyeen xaalada guud ee uu dalka marayo.
kadib markii ay arkeen duulaanka qaawan ee lagu soo qaaday
diinta Islaamka oo laga dhigtay hadba sidii la rabo.
kadib markii ay culimadu tix geliyeen cabashadda ba'an ee
kasoo yeertay shacabka Soomaaliyeed ee wada suniga ah.
Kadib markii ay culimadu u kuur galeen baabi'inta iyo burburinta
lagu hayo astaanta dalka sida: faagida qubuuraha halgama
yaashii dalka oo ay ugu horeeyeen culamaa'udiinka Ahlu-Sunna,
bedelida calanka Soomaaliyeed iyo dhaqanka suuban, bedelida
ummada iyo madax banaanida dalka.
Markii ay culimadu dareemeen inay soo ifbaxeen shaqsiyaad
sheeganaya hay'adda culimada Soomaaliyeed oo doonaya inay
magaca culimada ku gaaraan dano siyaasadeed iyo kuwo gaar
ah.
kadib markii la'arkay ugaarsiga lagu hayo maclimiinta mudarisiinta,
aqoon yahanka, dhaqaatirta, saraakiisha dalka iyo dadka
biri mageydada ah ayaa culimada waxaa ay soo saareen qodobadaani:
1. Culimada Ahlu-sunna waljamaaca waxaa ay cambaaraynayaan
falalka foosha xun ee la'isugu dayayay in lagu mamnuuco
soo dhoweynta dhalasha Nabi Muxamed CSW ee ka dhacday qaar
kamid ah Gobolada dalka.
2. Culimadu waxaa ay cadaynayaan in falalkaasi ay lidi ku
yihiin diinta laguna farax gelinayo cadowga islaamka ee
Yahuuda.
3. Culimadu waxaa ay ceebayn dusha uga tuurayaan falalka
lagu qufayo laguna bixinayo lafaha halgamayaashii dalka
iyo diinta.
4. Culimadu waxaa ay isku raaceen in falakaasi yihiin kuwo
kasoo horjeeda shareecada islaamka looguna adeegayo cadawga
ummada.
5. Culimada waxaa ay si aad ah uga xun yihiin in mashaa'iqdii
dalka ee qeybta lixaadka leh kasoo qaatay fidinta diinta
lagu tilmaamo mushrikiin, taasi oo loola jeedo in shacabka
Soomaaliyeed dhamaantoodu ay yihiin gaalo hadda la'islaaminayo.
6. Culimadu waxaa ay aamin sanyihiin in falakaasi yihiin
diinta oo lagu duminayo magaca diinta si loo fuliyo afkaar
shisheeye.
7. Culimadu waxaa ay ka soo horjeedaan baabi'inta astaanta
dalka sida: Calanka, taariikhda maashaa'iqda, dhaqanka suuban
iyo madaxbanaanida, falalkaasi oo ay ku howlan yihiin kuwo
maskaxda shisheeye ka'ah muqaalkana Soomaali ka ah.
8. Culimadu waxaa ay ka soo horjeedaan in magaca diinta
laga dhigto arin lagu gaaro dano siyaasadeed iyo kuwo gaar
ah.
9. Culimadu waxaa ay cadeynayaan in shaqsiyaadka isku magacaabay
hay'adda culimada aysan ka turjimaynin culimada Soomaaliyeed.
Ayna qeyb ka yihiin mashaakilka dalka ka jira.
10. Culimadu waxaa ay ugu baqeen shacabka iyo dowladuba
inaysan ku kadsoomin kuwa diinta u fasiraya hadba sida waafaqsan
danahooda waxaana cad in dowlada ay u maleegayaan kooxdaasi
shirqoolo ka dhan ah, iyagoo soo saara awaamiir aysan xaq
u lahayn.
11. Culimadu waxaa ay u soo jeedinaysaa dowlada inay muujiso
doowrkeeda mas'uuliyadeed ee ku aadan dalka, dadka iyo diintaba.
12. Culimadu waxaa ay sidoo kale ugu baaqayaan dowlada inay
cadayso mowqifkeeda ku aadan Mowliidka Nabi Muxamed CSW,
laguna fagayo lafaha culimada Soomaaliyeed misna lagu gubayo
calanka Soomaaliyeed.
13. Culimadu waxaa ay soo dhoweynaysaa ku dhaqanka Shareecada
Islaamka, waxayna ku adkeynayaan dowlada inay ku dabaqdo
mad habka shaaficiga madaamaa u yahay madhabka ay Soomaalidu
ku dhaqanto.
14. Culimadu waxaa ay shacabka Soomaaliyeed ugu baaqeen
inay iska difaacaan Khawaarijta duulaanka iyo qarbudaada
qaawan ku soo qaaday dalka iyo dadka iyo diinta.
15. Culimadu gaba gabadii waxaa ay cadaynayaan in dagaalada
ka jira Gobolada Galgaduud, Gedo iyo Jubadda Dhexe ay yihiin
weerar lagu soo qaaday culimada Ahlu-Sunna Waljamaaca iyo
shacabkooda, sidaa darteedna ay xaq u leeyihiin shacabku
inay iska difaacaan qawaarijtaasi duulaanka ah.
Bayaanka kadib culimada halkaasi ka hadashay waxaa kamid
ahaa:
1. Macalin Cabdiraxmaan Sheekh Suufi.
2. Sheekh Xassan Dheere.
3. Sh. Sayid Sh. Aba Cali Sh. Maxamed Sh. Cali Maye.
4. Sh. Muuse Cadde
5. Sh. Nuurdiin Rooble Xuurshoow.
6. Sh. Muuse Cagaweyne.
Iyo Culimo kale oo aad u fara badan
Wariyaha
Ahlusunna Muqdisho
baashicali@hotmail.com
